Il-Leġġenda tal-Kappella tal-Isperanza

Jekk wieħed jimxi matul il-Wied tal-Isperanza jilmaħ kappella żgħira mibnija f’xifer dan il-wied. L-oriġini ta’ din il-kappella tmur lura għaż-żminijiet tal-furbani, fis-sekli 15 u 16. Xi wħud jaħsbu li l-kappella nbniet bħala ringrazzjament lill-Madonna mingħand tfajla raħħala, li ħelsitha mill-qilla tat-Torok.

Jum wieħed niżlu xi Torok f’bajja kwieta fit-Tramuntana ta’ Malta. Ħadd ma nduna bihom. Malli niżlu, dawn bdew jaħarqu l-uċuħ tal-għelieqi, jaqbdu l-annimali u jkaxkruhom lejn il-ġifen. Riedu wkoll jaqbdu xi nies biex ibigħuhom bħala lsiera u b’hekk jiddubbaw kemxa flus tajba. It-Torok baqgħu mixjin pass wara pass, sakemm fl-aħħar waslu fit-tarf tal-Mosta.

Tliet aħwa xebbiet kienu qed jirgħaw merħla mogħoż f’dawk l-inħawi. Dawn kienu jmorru hemm kuljum. Ħin minnhom, waħda mit-tfajliet tilmaħ lil dawn it-Torok jistaħbew wara xi blat kbir li kien fil-qrib u bdiet tgħajjat kemm tiflaħ. Minnufih, l-aħwa ħallew il-merħla u bdew jiġru b’kemm kellhom saħħa. Waħda minnhom baqgħet lura. Ma setgħetx tiġri daqs l-oħrajn għax kienet zoppa. Ma kellhiex dik is-saħħa li kellhom it-tnejn l-oħra. Din it-tfajla kompliet tiġri kif setgħet biex forsi ssib xi razzett jew lil xi ħadd li jkun jista’ jagħtiha daqqa t’id. Ma kinitx taf sewwa fejn kienet sejra. Kull meta bdiet tħares lura, bdiet tilmaħ lil dawk it-Torok jiġru warajha. Il-forza bdiet tmajna.

Kompliet għaddejja sakemm waslet fit-tarf tal-Mosta. Ma setgħet tara xejn ħlief għelieqi, l-ebda moħba biex tistkenn fiha minn dawk it-Torok. Kienet taf sewwa li jekk taqa’ taħt idejhom, kienet tispiċċa f’xi suq tal-Afrika ta’ Fuq biex tinbiegħ bħala lsira. Kienet taf sewwa jekk tinqabad kemm swat u torturi kienet se ssofri. F’daqqa waħda rat wied mimli daqs bajda b’siġar u pjanti. Niżlet fih bi tbatija bil-ftit forza li kien fadlilha. Ħasbet li hemm żgur issib xi moħba. Kompliet għaddejja sakemm ma felħitx tagħmel pass ieħor. Talbet lill-Madonna biex tgħinha. Fl-aħħar sabet għar mimli għanqbut. Waħħlitha f’rasha li tidħol fl-għar u qabdet dieħla bejn l-għanqbut, kważi tħokk mal-blat.

Kif daħlet kompliet timxi sakemm waslet ġewwa nett. Hemm waqfet għax kienet għajjiena mejta u ma setgħetx tagħmel pass ieħor. Saqajha saru qishom ċomb. Moħħha reġa’ mar fuq il-Madonna. Talbet lill-Madonna biex teħlisha minn dawk it-Torok u wegħditha li, jekk teħlisha, tibni kappella u tiddedikaha lilha. Billi f’dawk l-inħawi kien hemm is-skiet, setgħet tisma’ l-passi u l-kliem tat-Torok. Fil-ħin bdiet tisma’ l-passi aktar fil-qrib, tant qrib li t-Torok kienu qishom daħlu fl-għar. Qalbha għamlet tikk. Kompliet titlob bil-qalb lill-Madonna biex teħlisha minn dak it-tiġrib. B’mod mirakoluż, il-brimba kienet reġgħet ħadmet l-għanqbuta li ċarrtet it-tfajla hekk kif daħlet fl-għar.

Wieħed mit-Torok kellem lill-oħrajn u wriehom l-għanqbut li kien hemm mal-bokka kollha tal-għar. Qalilhom li kieku xi ħadd kien daħal fl-għar, l-għanqbut kien jiċċarrat. Għalhekk kienu qed jaħlu l-ħin ifittxu fl-għar. Sa fl-aħħar it-Torok bdew jitbiegħdu mill-għar u l-passi bdiet tismagħhom ’il bogħod ’il bogħod. It-Torok xorta waħda komplew ifittxu ma’ kullimkien għat-tfajla, imma kollox kien għalxejn. Xħin qatgħu qalbhom telqu minn dak il-post u t-tfajla ħadet ir-ruħ. Stenniet sakemm beda jidlam, ħarġet mill-għar u kif ma kien jidher ħadd fil-qrib, ġriet lejn il-Mosta biex tmur lejn darha.

Meta waslet sabet il-familja kollha mħassba għaliha. Kienu se jibdew ifittxu l-għajnuna tal-ġirien u l-qraba. Għalhekk malli daħlet daru magħha u hi qalet b’kollox ’l ommha u ’l missierha. Qaltilhom ukoll bil-wegħda li kienet għamlet. Ma damitx ma bdiet tiġbor il-flus biex twettaq il-wegħda. Ħabbtet bieb bieb, kellmet lil kull persuna li rat u bil-mod il-mod il-flus bdew ġejjin. Ġebla wara ġebla, il-kappella bdiet tinbena fuq l-għar fejn it-tfajla salvat mill-qilla tat-Torok. Din il-kappella għadha propju hemm sal-lum biex tfakkarna fl-istorja ta’ dik it-tfajla, li bil-fidi li kellha rnexxielha ssalva minn għawġ hekk kbir.