(Il-kontenut tal-Kotba Diġitali żviluppat għall-Qari Għal Qalbi/Malti llivellat, li qiegħed miżmum fuq din il-pjattaforma u l-kodiċi HTML5 tiegħu, għandu jibqa’ l-proprjetà intellettwali tal-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni, u għalhekk ma jistax isir użu kummerċjali u/jew profitt minnu).

Gun, id-Dragun f'Art il-Kesħa

‘Brr! Brr! Kemm hawn kesħa! Jien kif sibt ruħi hawn, f’art il-kesħa?’ staqsa Gun lilu nnifsu. ‘Din mhix is-saltna tiegħi. Dan it-temp ma jgħoddx għalija. Jien imdorri ngħix fis-sħana.’
Gun beda jibki. Id-dmugħ beda jiżżerżaq ma’ ħaddejh u għamel għadira fl-art. “Irrid immur id-dar, irrid immur id-dar.”
Ħadd ma wieġbu. Gun beda jaħseb. X’kien għaddej minn moħħu?
null
Paġna 1
‘Tgħid nilbes ħafna ġkieket fuq xulxin u ntella’ l-barnuża ħa ssaħħanni? Tgħid infittex ftit ħatab u nqabbad xi ħuġġieġa? Imma minn fejn se nġibu l-ħatab jekk ħlief silġ m’hawnx? Naf x’nagħmel! Nibda nonfoħ u narmi n-nar minn ħalqi biex inħoll dan is-silġ kollu. Hekk ma nħossx iktar il-kesħa.’
Gun beda jonfoħ u jonfoħ, u jtajjar in-nar minn ħalqu donnu kien vulkan.
Puff! Puff! In-nar beda jfexfex hekk kif imiss mas-silġ.
Fixx! Fixx! Bil-mod il-mod is-silġ beda jinħall.
null
Paġna 2
Ġewwa l-għarix tiegħu, Klaws inħasad. Kien beda jħoss is-sħana.
“Jaqaw ħarġet ix-xemx? Qatt ma ħassejt sħana qabel.” F’daqqa waħda Klaws lemaħ is-silġ jinħall taħt saqajh. “Oj! Oj!” għajjat. “Għandna l-inkwiet! Inkwiet kbir! Il-lejl tal-Milied dalwaqt jasal u għandi bżonn ħafna u ħafna silġ biex noħroġ inqassam ir-rigali lit-tfal. Mingħajr is-silġ, is-slitta ma timxix. X’naqbad nagħmel?”
null
Paġna 3
Ħareġ jittawwal barra. Fil-pront ra lid-dragun jonfoħ u jtajjar in-nar minn ħalqu. “Iii! Mela għalhekk is-silġ qiegħed jinħall!” Klaws kien jaf li ma setax jeħodha mad-dragun. Kien jibża’ li jibilgħu. Għalhekk daħal jiġri ġewwa l-għarix u beda jċempel it-telefown.
Ċlinn ċlinn! Ċlinn ċlinn!
“Ajjut! Ajjut! Għinuni jaħasra!”
null
Paġna 4
Stikku s-suldat kien joqgħod fil-qrib. Huwa kellu karozza bil-ġwienaħ u bir-roti kbar iqarmċu kull meta ddur il-katina, għax fuq is-silġ il-karozzi ma jimxux mingħajr katina. Hu kien jużaha biex jgħin lil ħaddieħor. Kien joħroġ ifittex in-nies mitlufin biex jurihom minn fejn jgħaddu, għax fuq is-silġ it-toroq ma jidhrux u n-nies ta’ spiss kienu jintilfu.
Ftit ilu kien ċempillu Klaws. Talbu l-għajnuna tiegħu.
“Dalwaqt tarani hemm,” qallu Stikku.
null
Paġna 5
Malli wasal, Stikku s-suldat ra lid-dragun jonfoħ in-nar u lemaħ roqgħa kbira fejn kien inħall is-silġ.
“Ara sieħbi Gun. Jaqaw tlift it-triq?”
“Iva,” wieġbu d-dragun. “Intlift u hawn kesħa xxoqq il-għadam. Kemm nixtieq li nerġa’ nsib it-triq lura lejn is-saltna tas-sħana.”
null
Paġna 6
“Jien nafha t-triq u lest inwasslek ukoll,” wieġbu Stikku. “Irkeb.”
Id-dragun waqaf jonfoħ u ta qabża għal fuq il-karozza.
Bumm! Kienet qisha waqgħet ħaġra kbira. Il-karozza tgħattnet xi ftit bil-piż.
“Suq,” qallu d-dragun.
Stikku fetaħ il-ġwienaħ tal-karozza. Kienet qisha ajruplan. Stikku xegħel il-magna, għafas il-gass u telaq bih għal għonq it-triq. Il-karozza bdiet ittir u taqbeż bl-iskossi qisha ġurat. Is-saltna tas-sħana kienet in-naħa l-oħra tad-dinja. Hemmhekk kien hemm sajf biss.
null
Paġna 7
F’art il-kesħa, Klaws ħa nifs qawwi. “Hekk aħjar! Ftit jiem oħra u s-silġ jerġa’ jagħqad u nkun nista’ nagħmel il-vjaġġ sabiħ tiegħi biex inferraħ lit-tfal. Is-slitta armata għal-lest. L-ixkora l-ħamra mimlija bir-rigali. Kulma jonqos hu li jasal il-lejl tal-Milied.”
null
Paġna 8
Tmiem