(Il-kontenut tal-Kotba Diġitali żviluppat għall-Qari Għal Qalbi/Malti llivellat, li qiegħed miżmum fuq din il-pjattaforma u l-kodiċi HTML5 tiegħu, għandu jibqa’ l-proprjetà intellettwali tal-Ministeru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni, u għalhekk ma jistax isir użu kummerċjali u/jew profitt minnu).

Ġanluka u Maruska 03: Vaganza Għawdex

$null$

L-anniversarju tat-tieġ ta’ Franko u Veronika, il-ġenituri ta’ Ġanluka u Maruska, din is-sena nzerta fil-vaganzi tal-Għid. Għalhekk il-familja kollha ddeċidew li jmorru jqattgħu ġimgħa f’lukanda f’Għawdex.
Kemm ferħu l-aħwa b’din l-aħbar sabiħa, u kellhom seba’ mitt sena sa ma tasal dik il-ġimgħa!

Paġna 1

Il-mamà ħadet ħsieb tippakkja l-bagalji sa minn ġimgħa qabel. Kien il-Ħamis filgħodu kmieni meta l-papà għabba kollox fil-karozza u lkoll flimkien telqu lejn il-gżira sabiħa t’Għawdex.
Tistgħu taħsbu kemm ħadu gost u xxalaw Ġanluka u Maruska, speċjalment li inzerta għamel temp sħun u sabiħ, u b’hekk setgħu jgħumu fil-pixxina tal-lukanda.

Paġna 2

Ma naqasx ukoll li jattendu għall-purċissjonijiet kemm tal-Ġimgħa l-Kbira kif ukoll dik ta’ Kristu Rxoxt, li jsiru f’diversi rħula Għawdxin. Żaru wkoll xi postijiet ta’ interess, fosthom iċ-Ċittadella u xi mużewijiet li nsibu fiha, is-Santwarju tal-Madonna Ta’ Pinu, il-Fanal ta’ Ġordan u l-Ġgantija. Imma l-ġimgħa malajr għaddiet u l-familja reġgħet lura d-dar biex tkompli bil-ħajja ta’ kuljum.

Paġna 3

Hija u tneħħi l-ħwejjeġ mill-bagalji, il-mamà indunat li bi żball kienet ippakkjat il-hairdryer tal-kamra tal-lukanda li kienu qagħdu fiha, u tgħidx kemm inkwetat.
Meta l-papà wasal lura mix-xogħol u qaltlu x’kien ġara, dan malajr serrħilha rasha. Fakkarha li dik il-ġimgħa stess kellu jmur Għawdex b’xi xogħol tal-kumpanija u għalhekk seta’ jirritorna l-hairdryer lil sid il-lukanda.

Paġna 4

$null$

Is-Sur Zammit, sid il-lukanda, stagħġeb mhux ftit meta l-papà spjegalu l-iżball ġenwin li kienet għamlet martu u tah lura l-hairdryer. Dan għaliex is-Sur Zammit qal lill-papà li fit-tletin sena li kien ilu jmexxi l-lukanda tiegħu qatt ħadd ma rritorna l-oġġetti nieqsa li kienu jonqsu mill-kmamar.

Paġna 5

$null$

Bħala ringrazzjament tal-onestà li wrew, is-Sur Zammit stieden lill-familja kollha biex meta jridu jmorru jqattgħu tmiem il-ġimgħa fil-lukanda b’xejn.

Paġna 6

Tistgħu taħsbu dakinhar kemm ferħu Ġanluka u Maruska xħin waslu lura mill-iskola u saru jafu mingħand il-mamà bl-istedina li kien għamlilhom is-Sur Zammit! Kemm hi ħaġa sabiħa li nkunu onesti!

Paġna 7

Tmiem